Hebrews 1
Shekwoyi Ɓei Daɓo
1Nsapai Shekwoyi ɓei daɓo n azokwoi mwabegye nsasai. Wa daɓo n ɓai n ruya yi, n-enayi, Njesun wa daɓo ga eyi adada n anabi ʼgbe. 2Ama nsaiye Shekwoyi daɓo yi n wo Nugun ʼgbe Yesu. Anya vinya wo nu zhin ɓa gado gyiyi. Owo nu na zhin ɓa.3Yesu nu wu Shekwoyi buzangna ɓehin-hin nya, wonu zhin Shekwoyi degbe, Owo iko nu shi aɓo bwa vinya. She wo ɓei pwo ya laifi zhanya ɓo, n wo ami yi wa lo wa sase n Shekwoyi shinkpegye bwaizhe-bwa. 4Aɓei la Yesu ze oza ndu a malaika. Aga wo eye ndu oɓa nya. 5Shekwoyi shin malaika ho gna ge, “Ho zhin mi nugun nu, mi la ho ma n naiye n jesun ma ze ngye oho dada?” Awo. 6Ama wa ci Yesu ge, “Ho zhin omi ʼɓi nu, amalaika vinya ɓa la hotu.”
7Shekwoyi wa gna ge, a malaika wu ngye ese nu nkwo zhin kwa ci barkete nsaho-sahoyi nyi, ntu ge ɓa zhin Zafun nu. Owo a bara wu ngye ena yitala nu. 8Ama wa ci oɓi ge, “Oho begyi ta shan zon, ko ɓa ze busi kwa wu ɓefyece. Oho busi tnu-tnu nya ɓefyece nu.” 9Ho ye atnu-tnu manayi to haye alaifi m. Ntu ce nu oho Shekwoyi gmanyi, wa gaho agmada duduyi.
10Ha zhin eshe, ha zhin ekni n ho ikoyi. 11Eshe n ekni yi ɓaɓa diya, ama ho ta shan fi m. Ngye aje kokoyi oɓa asa ɓai zeye. (Wato eshe n ʼkni). 12Ho ɓa ya ɓa ngye aje sakun, oɓa asa ɓa zeya, Amma ho ta shan don, oho anyipyei ɓa ɓeɓe nu.
13Shekwoyi shin a malaika gna ge, “Fye sase nmi bwaizhe-bwa har ma ze fye nuwunyi efya abara?” Awo.
14Ɓa zhin amalaika a tnu-tnu loi nu n na tnu n ɓai ɓa bma a Yesu viyi zhin. Njesun nazai n ɓa ɓe Shekwoyi aba nyi.
Copyright information for
GbrGAW